Pig's Playground

2006-12-01T17:40:00.000+08:00

曾經係'一次reload, 二十個posts'既os科林, 最近變得沉寂, 有時甚至可以用死寂黎形容, 有時真係'廿次reload, 都無一個post'!!! 曾經大家無時無刻都踴躍出post, 鄰居們友善地o係網上解答大家既問題, 組織唔同既活動, 有時你窒下我, 我又窒下你, 明明係正經題目都會被扯到離天萬丈遠, 講下笑下又過一日, 為沉悶既工作帶黎一點歡樂! 但係唔知由幾時開始, 科林變得只有小貓三四隻, 一條thread只得兩三個回帖, 點解會咁? 因為悶? 嘈過幾次?　大家工作忙碌？　轉工唔方便上網？　情願留o係chatroom? 抑或有其他原因??? 我唔知道, 亦唔打算深究, 通常遇到呢種情況, 大家都會用"天下無不散之筵席"黎總結, 唔知對科林啱唔啱用呢?

我好懷念以前既科林....

禮物

2006-11-29T17:38:00.000+08:00

早幾日老公一次過送左2份禮物俾我, 令我好驚喜! 令我驚喜既原因唔係因為有禮物收或者禮物既價值, 而係送禮物既方法, 令我知佢有花過心思tum我! ^_^ 呢幾年佢既工作都好忙碌, 成日都要開ot, 又要返教會, 搞到成日都好疲累, 我都明白佢唔能夠花太多時間o係我身上! 所以近幾年既生日, 週年記念等都過得好平淡, 只係食下飯就算, 所以今次佢既舉動令我真係好開心呀!

記得有一年情人節, 朝早訓醒覺果時, 忽然發現床頭有一張佢親手做既情人卡, 張卡好靚好精緻, 仲用左我最鐘意既豬豬做左個立體公仔圖案, 當然再加上一d溫馨字句啦, 當堂覺得果朝令舍醒神; 跟住落床去洗手間, 發現又有另一張卡放o係洗手盤; 梳洗完換好衫, 準備攞手袋, 又發現有另一張o係手袋裡面; 攞完袋攞鎖匙, 又見到有另一張卡放o係鎖匙下面...嘩,真係驚喜一浪接一浪呀! 原來佢總共做左4張唔同既卡分別放o係我每朝早都會去既地方, 收到果4張卡既時候真係令我好感動好開心呀!

所以我幾時都話:禮物唔駛貴, 肯花心思最可貴!!!　＾＿＾

一年的改變 (2)

2006-11-28T11:24:00.000+08:00

記得o係去年年尾達達問我地今年既大計係乜, 當時我話要'的起心肝'做人, 仲被一班街坊笑我乜生仔都要'的起心肝'既咩! 估唔到o係今年年中呢件事會成為事實! 結左婚已經有好幾年, 家人都催促左好多次, 只係一直提唔起勁去實行! :p 老實講, o係一, 兩年前, 我真係好恨生BB, 只係原來要懷孕確實唔係一件容易既事, 又要時間配合, 又要身體配合, 做埋check up, 仲不斷放o係禱告裡面, 但神都無應允, 於是我地又開始懶懶閒, 結果就咁樣擱置左! 最近一年, 我地既想法改變左, 覺得有小朋友係開心, 但其實兩個人都有兩個人既好處, 所以都係順其自然啦!

點知, 去年聖誕節後, 成日覺得飽飽滯滯咁, 仲以為Christmas party食滯左添, 後來覺得真係唔係好妥喎, 先發現原來神已經悄悄將小生命賜下, 我諗神真係有自己既時間表, 感謝神!

懷孕既日子真係唔容易熬過, 開頭幾個月係不斷咁嘔, 嘔到我開始有d後悔生仔, 點知有一次見紅, 果下我真係好驚, 好驚會無左個BB, 我不斷求神保守我肚裡面既小生命, 我同神講如果bb可以存活, 就算幾辛苦我都願意! 到果一刻我先知道原來我真係好愛呢個BB, 好唔想失去佢... 而我地既神當然係又真又活既神啦, 因為我個BB無事, 而同時我又真係比之前嘔得辛苦左好多喎! 另外, 懷孕期間要接受一連串大大小小既檢查, 都令我有好大壓力, 每次檢查結果合格, 都有好似又過左一關的感覺! 到後期仲要擔心唔知BB係咪健康, 今日郁左幾多次, 會唔會俾臍帶纏頸? 總之要擔心既野天天新鮮, 日日不同, 不過o係呢段期間, 真正學識交扥, 每次有咩唔妥, 都會同神講, 我將bb既生命交俾佢, 無論結果如何, 我都會順服!

因為bb仔無調頭, 所以一早約左醫生o係8月15號開刀, 記得最後一次產前檢查果日, 一心諗住仲有幾日就見到仔仔, 點知醫生懷疑我有妊娠中毒症, 要我果晚即刻入院生仔, 真係完全無心理準備, 我仲連走佬袋都未執, 搞到lea咁hea! 去到醫院, 一切都好緊急, 做緊入院檢查果陣, 手術室不斷打黎催我落去, 我又未做過手術, 佢地仲話有可能唔俾我老公陪產添, 當時個心真係好驚好驚! 入到去手術室, 原來真係好似做戲咁, 有好大好光既燈, 醫生同護士都準備緊手術用具, 麻醉師又同我講解麻醉既感覺同埋我將要做既野, 唯一唔同既係大家都好似好輕鬆咁, 全場係得我一個咁鬼死緊張! =_=" 後來老公都入埋黎, 我先至定d ja! 可能因為係生仔而唔係做d咩大手術, 所以整個手術過程既氣氛都好輕鬆, 大家仲可以有講有笑添, 大約十零分鐘後, 我個花豬仔就出左世啦, 仲即時同佢影左張全家福添! 果日係2006年8月5日, 一個我永遠都唔會忘記既日子!

一年的改變 (1)

2006-11-28T10:54:00.000+08:00

距離上次update呢個blog, 已經整整一年啦! 一年時間雖唔算長, 但改變卻不少! 首先, 我既工作改變左, 去年因為部門重整, 我果組同另外一組合併左, 連manager都二合為一! 我既老闆被削左職, 因為佢既新職位不能有assistant, 於是我被調到另一組, 工作性質亦改變左! 現在我果組係負責整個部門既Quality, training同projects, 而我既工作係以分析為主, 經常要做好多數據分析, 仲有沒完沒了既reporting, 又有好多大型既project要跟, 對於呢d工作我真係全無經驗, 好彩我個新老闆願意經常教我, 我先至可以邊學邊做! 仲有, 我個新老闆其實是坐o係Singapore office架, 所以我同她既所有溝通都要靠長途電話同e-mail, 非常之唔方便, 但咁有好處既, 起碼佢唔會見到我工作時上網, 又唔會成日gup住我做緊咩, 只要我within timeline做完d野就無問題! 對我而言, 呢個新職位係幾好架, 起碼前途好d, 又有返咁上下挑戰性, 另外因為要經常同其他亞洲國家既同事開會做projects, 所以我都認識左好多唔同國家的同事! 所以有時改變未必唔係一件好事黎既!

十字路口

2005-11-28T10:40:00.000+08:00

昨天祟拜講道, 講員(君成)在講到教會最近為著擴堂的事, 大家像站在十字路口不知如何下決定時, 忽然感觸落淚, 而在場也有不少弟兄姊妹被感動落淚呢! 的確, 這一,兩年來, 教會的會衆們為著擴堂的事, 已有不下數十次的討論, 其中幾次甚至演變成爭論, 並且有幾位會友因此而離開教會, 有些因為錢的原故, 有些因為自己的意見不被採納, 有些甚至認為跟本不需要擴堂等等...

事件已擾攘了接近兩年, 到底我們在這十字路口還要再徘徊多久呢? 要像昔日的以色列人一樣在曠野徘徊四十年嗎? 為何各人的焦點總是放在一些身外物上呢? 其實大家都是為著神的家而努力, 希望能發展更多的福音事工, 為何現在卻會變成這樣呢? 很心痛看到昔日同心的弟兄姊妹, 現在各持己見, 互不退讓! 希望大家站在這個十字路口上, 能認清誰才是我們真正的領袖, 能放下彼此的成見, 一同向目標進發!!!

*p.s 君成, 對不起, 我一直以為你已不再留戀這個大家庭了, 但你昨天的表現, 真的把我嚇了一大跳呢! ^_^ 真的很懷念以前與你在約瑟團的日子!

讓我再一次歸向你

曾經答應你，將生命交與你，
在每段路上，信靠你，跟隨你，
但我卻一次又一次，
在困阨中墜落，在軟弱中背棄你。

曾經答應你，將生活交與你，
在每件事上，信靠你，跟隨你，
但我卻一次又一次執意自己決定，
沒有在意，你傷心。

但你不曾把我離棄，全心愛我，伴著我，
黑暗中以光照亮我心，來帶領我路。

我神啊！讓我再一次，完全放下自己，
歸向你，等候你，聽從你，
全心跟隨你。（不再離去）

呀!!!!!!!!!!!!!!!!!!!!!!!!!!!!

2005-11-25T11:31:00.000+08:00

無見一輪, 點解我隻可愛到極點既白白豬會變成咁既? 宜家一d都唔可愛, 仲好鬼死核突呀!!!!!! 但係我又唔捨得唔要佢, 因為佢曾經俾左快樂我, 以前無無聊聊睇住佢, 個人都開心d...

Happy Birthday to....

2005-11-01T15:47:00.000+08:00

祝你...
生日快樂!
身體健康!
工作順利!
事奉得力!
主的恩典常與你同在!

暫別

2005-09-05T14:51:00.000+08:00

思緒整理中......要停一停, 抖一抖............

無題

2005-08-23T11:46:00.000+08:00

最近不知是受天氣影響還是心情影響, 總是提不起勁寫作...! 心裏實在有太多無奈, 看到不同人不同的咀臉, 各人表面一如以往, 各自內心卻不知盤算著甚麼? 人, 的確是最可怕的動物!!! 曾經很害怕成長(其實現在也是一樣), 因為隨著年紀漸大, 體會愈多, 就更能察覺到人的黑暗面! 有時又看到原來身邊的你,我,他都不斷在轉變, 甚至不知不覺間已轉變得不是以前熟悉的人了, 縱使你們可能天天都會見面! 害怕成長的另一個原因是怕自己也會成為'他們'的一份子, 為了適應環境, 埋沒了從前的性格, 變成隨波逐流, 多可悲!

Charlie And The Chocolate Factory

2005-08-10T23:04:00.000+08:00

期待已久既朱古力掌門人終於都上畫啦，快Ｄ去撲飛啦老友們！！！

出海夜遊

2005-08-08T13:52:00.000+08:00

琴晚同一班年青人出左海chok墨魚, 原先仲以為會好熱添, 但係當出到海, 一路瞓o係甲板上面望住天空既星海, 一路有陣陣既海風吹來, 真係好涼爽好舒服! 整晚既收穫唔多, 28個人只係chok到9條墨魚, 不過無所謂啦, 可以同佢地一齊傾下計, 玩下笑下都已經可以好開心!

心情

2005-08-03T10:09:00.000+08:00

人的心情很奇怪, 有時會忽然情緒高漲興奮莫明, 一時卻急劇下墜似入深淵, 情況尤如坐過山車! 情緒的起伏, 不一定是因為甚麼大事, 有時可能只因穿了一套合意的衣服, 或是一小件精緻的蛋糕都能叫人樂上半天; 相反, 一齣劇情不合理的電影, 身邊人不合理的回應都可令人不快! 友人曾經電郵過一篇不知是何許人作的文章, 大概叫"快樂的鑰匙"之類, 內文是指我們很容易為身邊的人和事而不快, 但到底為何我們要因為其他人的不是而不快樂呢, 我們才是抓著自己快樂的鑰匙的人! 不要用其他人的不是來懲罰自己, 不要要求別人使我們快樂, 我們反而要將快樂分給其他人! 是的, 我亦要學習做個抓緊自己開心的鑰匙的人!

一切從新開始

2005-08-01T13:56:00.000+08:00

今天是OS forum重開的大日子, '新版面, 舊面孔', 重見很多forum的朋友!

由於版面是全新的, 還有很多不習慣的地方, 連我最喜歡的smiley都不見了, 很多東西都要重新適應....但這些於我而言並不重要, 最重要乃是有一個地方, 可讓我們閒時上網談談情, 說說笑, 讓我們在煩悶的工作中得著喘息的機會!!!!!

勞苦功高的Uncle-DOS和Admin group, 謝謝!!!!!!!!!

Forum restart

2005-07-29T18:12:00.000+08:00

今日Uncle-dos出左以下既聲明：

Please be informed that the OS Forum will be down from Saturday for maintenance. All data will not be secured. Please backup your important messages, especially your PM account.

The forum will be opened around on Monday!

FORUM will use NEW SYSTEM, old forum message will not be migrated!

Thank you for your attention!

Regards,

Uncle-DOS

要重新登記! 舊文章會無晒.

請重建!

切記用新密碼! (因懷疑系統及(PM)文章內容遭某User 入侵, 所以更新系統)

＊＊＊＊＊＊＊＊＊＊＊＊＊＊＊＊＊＊＊＊＊
今晚之後，OS forum就會restart，一切將重新開始，新既版面，新既login, 所有而家既文章同PM都會無晒！希望真正能做到'舊事已過,都變成新的了’！！！

在豁達的境界裏

2005-07-28T01:20:00.000+08:00

我喜歡找一些豁達的人做朋友，跟他們做朋友，你的個性也會變得豁達一些。

豁達了，做人才會快樂。

有些人的朋友盡是心胸狹窄之輩。他們小家敗氣，嫉妒心重，看什麼都是負面的。他們記仇記恨，又喜歡排擠別人。他們一方面討厭成功人士，一方面又想親近這些人。他們的世界，充滿勾心鬥角和各種刻薄的批評。跟這些人做朋友，你早晚會變成他們那樣子。

豁達的人，不一定聰明，也不一定有才華，但他們把你帶到一個新的境界。在那個境界裏，你會因為自己心胸狹窄而慚愧，你會因為妒忌心重而覺得羞恥。

當你為了一些挫折而不開心的時候，這些朋友們會告訴你:「那不是挫折，那是波折而已。人生總是難免會遇到一些波折。」

當你為了小小的失意而沮喪時，他們會說:「你今天覺得很嚴重的事，他日也許只是小事一樁罷了。」

在你最失意的一刻，他們的豁達猶如一次舒適的按犘。原來你可以這樣看事情。原來大方的人比小器的人幸福許多。

那些鼓勵你去仇恨，慫恿你去妒忌的，絕對不是你的好朋友。　

張小嫻

我們的科林

2005-07-26T16:14:00.000+08:00

呢兩日OS Forum忽然靜左好多, 連d平時經常o係上面吹水打躉既嘩鬼們都靜得出奇, 加上兩大掌老既離開, 真係有d似將要結束既感覺...曾經好熱鬧既科林, 充滿笑聲笑話, 你一句我一句, 一次reload二十個posts既情境已不復見, 果d日子似近還遠, 到底係大家既熱情退卻左定係被早一輪發生既事影響?

......忽然間有一種失落既感覺!

>_<

2005-07-25T16:31:00.000+08:00

唉, 都唔知點work with佢, 有時又無乜野, 但係有時又要人做d mission impossible既野, 都唔知佢想點! 又睇唔起女仔, 成日覺得女仔唔掂, 又要讀HKU先叫掂, 俾佢激死!!!!!!

呻完!

白玉

2005-07-19T13:19:00.000+08:00

我好鐘意食白玉, 佢係一種細細粒, 好似湯圓咁樣但又比湯圓煙韌有咬口既食品, 佢同綠茶最老友, 所以經常結伴o係日式甜品裏面出現, 例如白玉配綠茶雪糕就係我最喜歡既日式甜品! 早2個月去日本既時侯, 哈記雪糕剛剛推出左綠茶白玉雪糕新地, 香濃既綠茶雪糕配上煙韌既白玉, 真令我一試難忘!

返到香港, 一直對果杯新地念念不忘, 就o係上個月經過海港城既哈記, 見到佢都剛剛推出左呢款新地, 當然要即刻試下啦! 接過侍應既手上既新地, 真係想大叫回水, 因為我期待既白玉變身成為~~~~~~棉花糖@.@!!!! 心諗有冇搞錯呀, 佢地知唔知咩係白玉呀, 求其俾d棉花糖就算...細問之下先知原來要有堂食既分店先有真正既白玉!!! =.="

好! 我決定俾多次機會佢, 上星期六尊登走去佢有堂食既分店, 誓要重溫白玉既美味! 去到鬼死咁多人, 仲要等左15分鐘先有位, 叫完野食懷住期待既心情去等待果杯綠茶白玉新地, 終於佢黎啦, 我一望.......天呀, 點解會咁架??? 佢今次真係無用棉花糖....但係竟然用左酒釀丸子果d丸子呀!!!!!!!!!!!!!! 救命呀, 佢地點可以咁架!!!!!!!!! 由極度期待到徹底失望...算啦, 我放棄啦, 想食好味既綠茶白玉新地, 都係去日本吧啦....此時, 我老公忽然話: 下次不如去麻布茶坊啦, 果度有真正既白玉..............跟住...我既希望又重燃啦!!!^_^

大老闆

2005-07-15T00:13:00.000+08:00

o係英國既大老闆Ｎ小姐下個星期黎香港，我老細既老細話Ｎ好鐘意洗錢，所以吩咐我要做歡樂小姐~~ 陪Ｎ去shopping! Shopping不嬲都係我強項，不過買自己野就話強jeh, 宜家係陪人買野喎，又完全唔知佢鐘意Ｄ咩, 之前又要同佢單獨食lunch喎, 仲要全情明珠台添！對於我呢個唔識（用英文）social既人黎講, 呢件真係天大既苦差！！！！既要頭痛同佢去邊度shopping, 又要諗下去邊度食lunch, 仲要係quick lunch先攞命, 因為佢話晒係高級人士黎架嘛, 同佢食正常lunch都話可以選D好少少既餐廳（其實來來去去都係果幾間），宜家食個快既, 唔通真係同佢去麥記咩！另外去shopping又唔知去邊好，上海灘就一定走唔甩, 咁去完又去邊？去Landmark? 果Ｄ牌子英國都大把啦，我Ｄ同事仲好笑, 叫我同佢去ZARA, 大佬呀叫佢o係ＨＫ買返歐洲野, 即係叫中國人去法國買毛筆jeh, 咁不如叫佢去Marks & Spencer啦！唉，唯有頂硬上啦！＋＿＋

我的他

2005-07-11T18:10:00.000+08:00

曾經好羨慕一d朋友, 因為佢地既男朋友好溫柔體貼, 對佢地無微不至, 例如會o係佢地生日或特別日子, 一早訂定位,買定花同禮物幫佢地慶祝; 當佢地唔舒服既時候又會成日打電話問侯; 又會失驚無神o係佢地工作既地方等佢, 然後預備定節目同佢地去街!

而我老公卻係一d都唔浪漫既人, 佢一定會事先打定電話俾我約好晒, 先會黎我公司樓下等我, 因為佢慌死我走左佢會白等; 以前每次收到佢既禮物, 我都好想拎返去換, 因為佢既taste真係.... 呢幾年我學精左, 我會o係生日前同佢去行下街, 指俾佢睇我覺得啱駛既野, 期望佢會買一份合心意既禮物俾我, 結果...佢一係買錯左隔離果樣一係就直頭唔記得左我鐘意d咩=.=!

不過, 同佢相處左咁多年, 我明白佢係一個實際既人! 同佢一齊唔會有咩浪漫驚喜, 但係佢會俾我安全感; 佢雖然唔會成日噓寒問暖, 但會o係我發燒既時候通宵守候o係床邊, 為我敷毛巾同探熱; 佢會為左呢個家努力工作; 佢會o係我傷心既時候陪我留淚禱告; 佢會好好珍惜呢份感情! 比起送貴重既禮物同做浪漫驚喜既事, 佢呢一份心意反而先至最適合我!

長大了

2005-07-11T11:40:00.000+08:00

好野, 白白豬終於大個左啦, 不過點解佢會講d符號既? 有時都唔知佢講緊乜, 傻下傻下咁, 不過好得意! 見到佢瞓覺個樣就覺得佢好可愛, 同埋好似瞓得好舒服咁, 仲要扯晒鼻鼾添, 正一傻豬!!!!!

咁口水花花又幾時會變大個呢?

生命

2005-07-08T10:37:00.000+08:00

人類一向都鐘意自以為聰明, 以為可以控制好多人和事, 但偏偏連自己條命都唔能夠捉住....

生命, 真係好難去捉緊! 以為自己仲年青, 仲有大把時間去博剎, 去享受, 去乜去物既時候, 生命既終點卻已靜悄悄地來到, 不留一點痕跡, 偷偷咁奪去左所有既時間... 剩下既只有傷心, 淚水, 同後悔! 最近知道一位好多年無見既教會朋友患上末期癌症, 更覺得生命無常, 就算幾有錢, 幾有能力都無辦法換多一時半刻既生命! 所以應趁仲有生命同健康, 好好咁生活, 無需為太多事而憂慮, 只要凡事睇開d, 人都開心d!
就如聖經講:「人若賺得全世界，賠上了自己的生命，有甚麼益處呢？」（聖經馬太福音16:26）

另外, 求神保守祝福果位弟兄一家o係患難中能有平安, 並且更緊靠神去打呢場杖!

白白豬２

2005-07-06T00:21:00.000+08:00

白白豬, 你幾時先長大呀？我見到人地既寵物blog長大得好快, 又識講野又識放屁, 你幾時會好似佢地咁呀, 我等得好心急呀！

再邂逅在三萬呎高空上

2005-07-04T23:15:00.000+08:00

呢本係最近睇緊既新書, 作者係一位空中小姐，佢透過呢本書去分享佢工作中睇到既人生百態同趣事, 仲有同事之間既鈎心鬥⻆, 上司既性搔擾事件等等..., 令我睇到好肉緊，亦令人對空中小姐呢個行業有更深既了解！值得一提既係作者本身係一位基督徒, 雖然佢o係工作中都面對唔少既問題, 但佢仍然謹記神既教導並要作一個好既見証！

Moody

2005-06-30T14:21:00.000+08:00

唔知係咪最近經常落雨既關係, 心情總係麻麻.....碰啱有唔如意既事, 內心既鬱悶同悲傷更加會無限擴大, 甚至擴大到不能自拔...

"今次真係唔開心, 一次, 兩次, 三次都係咁, 可以就咁抹左佢當無事咩? 我暫時真係做唔到lor!" 心裏面重複又重複住呢句說話! 其實好似好小事, 如果係平時遇到呢d事, 只要喊出黎就無事, 但係今次唔開心到....連喊都喊唔出喎, 可以點呢? 唉! 一日都係雨天作怪, 太陽伯伯, 請你快d出黎啦!

豬之友

2005-06-29T11:23:00.000+08:00

白白豬終於有第一個新朋友啦~~~口水花花!

白白豬

2005-06-28T15:55:00.000+08:00

白白豬係一隻靠食你個blog既文章而長大既寵物, 每次你出post就等如餵佢食野, 佢好得意, 好可愛架, 希望佢可以快高長大啦!!!!

你都可以去以下網址認領返一隻, 仲可以同我隻白白豬做朋友添!!!

http://meropar.jp/ (日文網址)
http://eva.shanger.net/blog/index.html (中文解釋既網址)

Tsumori Chisato

2005-06-27T11:15:00.000+08:00

從廣東道同Sino Plaza I.T.開始到百德新街既專門店, 我一直都係TC既擁躉! 好喜歡佢既日本少女風格, 既陽光又浪漫! 無論pattern或款式, 都有著無限既創意!

特別喜歡佢既crepie系列, 呢個原先只係設計師設計俾佢個女穿著既系列, 憑著小小既皺布而打出名堂, 成為呢個品牌既特式之一! TC既另一樣看家本領係雪紡, TC既雪紡一向都無令人失望過...
可惜, 自從去年TC進軍巴黎既時裝舞台開始, 佢既風格竟然作出180度既改變, 唔知係咪要配合法國人既口味, 佢刻意摒棄最拿手既少女風格而改行成熟加性感既路線, 埋沒左品牌本身既風格, 反而變得毫無特式! 好彩, o係2005/6 既F/W Collection, 佢既少女風格又回歸啦!

TC既改變令我諗起有D人為要討好別人或埋堆, 樣樣野都去刻意附和, 甚至埋沒自己既真性情同喜好, 咁樣反而變得惹人討厭!

唔聲唔聲, 嚇你一驚！

2005-06-26T22:38:00.000+08:00

今晚返左爹D媽咪屋企食飯，食食下飯，我同佢地講話我最近create左個blog, 都未講完，我爹D就話：咁你陣間俾個網址我呀!!!!! 我真係估唔到平時唔聲唔聲既爹Ｄ, 原來咁前衛，竟然知道咩係blog，仲要比我更早知添呀，等我仲諗定要點樣解釋佢知， 今次真係嚇左我一驚呀!!!!!!!!!!!!!

掛慮全交扥

2005-06-26T14:56:00.000+08:00

將一切掛慮全交扥，我將一切的重擔，放袮面前；每次當我不知所措，迷失方向，我將切掛慮全交扥於袮！我將切掛慮全交扥。

以上係今日領詩所帶既其中一首歌，唔知點解唱既時候忽然有想哭既衝動!!! 將一切掛慮全交扥，我將一切的重擔，放袮面前....我到底仲有無咁做呢？想起以前有單純既信心，同神講交扥就真係會乖乖既交扥，完全跟隨神既帶頜。但隨著年紀漸大經驗日多，再加上信主既年日增加， 果一份單純既信心就漸漸失落，好多野都變得公式化。可能呢頭祈禱交扥完，果頭已經諗東諗西想方法解決；情況就好比唱詩歌一樣，有Ｄ詩歌頭幾次唱會覺得好感動，但當唱過好多好多次之後，就會變成習慣, 就算無歌詞無音樂, 一樣可以隨口唱出，但當中既義意可能早已被遺忘！

感謝神藉詩歌再一次提醒！

Happy Saturday!!!

2005-06-25T15:10:00.000+08:00

Monday, Tuesday, Wednesday, Thursday, Friday, 又到左Saturday啦!!!!!

我最鐘意Sat, 因為今日係一星期中唯一屬於我自己既日子；我可以食、玩、瞓，見我想見既人，去我想去既地方，真係爽呀!!!!!!!!!!!!! 再加上今朝見到失蹤左一輪既☀伯伯,令我忍唔住要即刻打開晒全屋既窗黎呼吸下新鮮空氣!!!!! 夏天既感覺又返黎啦, hohoho!!!

同事

2005-06-24T09:51:00.000+08:00

自從搬左新office後, 唔知點解我個位會成為左一班同事吹水打躉既好地方...

同事A做事認真又快捷, 手上有幾個大project都可以做得頭頭是道, 無論公司定client對佢都係有讚無彈! 但唔做野果陣, 佢係經常發放笑蛋既人, 佢講既野經常都可以令到大家捧腹大笑; 佢最鐘意走過黎天南地北一番, 有時講下時事, 有講下無聊野; 有時仲會叫埋佢隔離部門既好兄弟一齊黎吹水大笑一番;

同事B係一個小心眼既女人, 最好唔好得罪佢, 否則你會o係任何事上被針對! 佢過親黎都係講其他人既不是, 吼住邊個入左老板房, 入左幾耐, 然後估計佢地傾乜野, 有時又投訴下邊個邊個得罪佢, 總之o係佢既世界, 所有人都係有問題! 有時我覺得唔耐煩都會'得'下佢, 咁佢都就會一輪唔過黎;

同事C係Manager, 我都唔知點解佢成日都可以咁鬼得閒, 成日走過黎講飲講食, 邊度好食, 邊度好抵, 放假同屋企人去左邊度玩, 佢個仔又點點點;

同事D最貪靚, 鐘意講行街買衫, 所以同我最啱key;

同事E係唯一真正黎'同我'傾計既人, 佢既性格同我老公冇十成都有九成似, 所以我好了解佢; 唔知係咪因為咁, 佢好鐘意同我講心事, 有時講下佢女朋友, 有時講下佢屋企既野, 又或者講下大家都感興趣既話題;

有時佢地又會集齊人馬黎吹水, 話之我講緊電話定係忙緊, 都會o係度高談闊輪一番+_+"; 不過無可否認, 佢地為呢個沉悶既office帶來左無限既歡樂!

只係, 我有時真係好懷念未搬office之前自成一角既日子....

豬豬

2005-06-24T03:17:00.000+08:00

好鐘意豬, 因為佢長相好得意, 人人以為佢好愚蠢, 好懶惰, 好污糟... 有幾多人知道其實豬係好聰明, 好乾淨, 好loyal既動物, 只係因為人類唔會好似對其他寵物咁愛護佢地, 所以令好多人會有所誤解...
生活上有時都會被誤解, 有時會憤怒, 有時會偷偷地喊, 有時想反擊, 有時想解釋, 不過諗深一層, 解釋左又點, 只係口舌上叫做拗贏人又點? 記得愛美麗o係OS Forum既金句係"被無關痛癢的人誤會了, 便由得他一錯再錯吧!" it's true, 誤會了, 又如何!!!!

Don't Worry, Be Happy!!!

2005-06-23T15:19:00.000+08:00

Don't Worry, Be Happy 是 Mr. Friendly 的格言, 亦是我經常用來提醒自己的一句說話... 畢竟要做一個開心快活人是殊不簡單的！